"హృదయ శుద్ధిగలవారు ధన్యులు, వారు దేవుణ్ణి చూచెదరు" (మత్తయి 5:8). మనం హృదయ శుద్ధి కలిగి ఉండకపోవడం మన కళ్ళను గ్రుడ్డిగా చేస్తుంది. హృదయ శుద్ధిగల వారికి దేవుడు తన గురించి అనేక విషయాలను వెల్లడిస్తాడు. లూకా 11:34 లో కన్ను దేహానికి దీపం అని యేసు చెప్పాడు. ఆ భాగాన్ని మత్తయి 5:8 తో అనుసంధానించాలనుకుంటున్నాను ("హృదయ శుద్ధిగలవారు ధన్యులు, వారు దేవుణ్ణి చూచెదరు").

"నీ కన్ను తేటగా నుంటె నీ దేహమంతయు వెలుగుమయమై యుండును" (లూకా 11:34). అంధుడిగా ఉండటం అంటే ఏమిటో తెలుసుకోవాలంటే, నీ కళ్ళు మూసుకో, అంధత్వం అంటే ఏమిటో నీకు తెలుస్తుంది. బయట ఉన్న వెలుతురు లోపలికి రాదు కాబట్టి నువ్వు ఏమీ చూడలేవు. "శరీరమునకు దీపము కన్నే; నీ కన్ను చెడ్డదైతే, లేక గ్రుడ్డిదైతే లేక కంటిశుక్లముతో నిండియున్నదైతే, నీ శరీరమంతయు చీకటితో నిండియున్నది. అప్పుడు నీలోని వెలుగు చీకటిగా ఉండకుండునట్లు జాగ్రత్తపడు. నీ శరీరమంతయు వెలుగుతో నిండియుండి దానిలో చీకటి లేకుండా ఉంటే అది పూర్తిగా వెలుగుమయం అవుతుంది" (లూకా 11:34-36).

ఈ వచనము మనస్సాక్షిని సూచిస్తుంది. మనస్సాక్షి హృదయానికి కన్ను. నీవు నీ మనస్సాక్షిని నిర్మలంగా ఉంచుకున్నప్పుడు, నీ హృదయము వెలుగుతో నిండియుండును, మరియు నీవు దేవుణ్ణి చూడగలవు. కానీ నీవు నీ మనస్సాక్షిని నిర్మలంగా ఉంచుకొనుటను నిర్లక్ష్యం చేసినప్పుడు, అనగా నీవు ఏదో తప్పు చేసి దానిని ఒప్పుకొనకపోతే - నీవు దాని నిందను తీసుకోకపోతే, నీవు వేరొకరిపై నిందను మోపుటకు ప్రయత్నిస్తే - కన్ను క్రమంగా మసకబారుతుంది మరియు నీవు దేవుని దృష్టిని కోల్పోతావు. నీకు ఇంకా బైబిల్ జ్ఞానంతో నిండిన తల ఉండవచ్చు, కానీ నీవు ఇక దేవుణ్ణి చూడలేవు, ఎందుకంటే దానికి తలలో ఉన్న జ్ఞానంతో సంబంధం లేదు; అది హృదయ శుద్ధితో సంబంధం కలిగి ఉంటుంది.

ఈ వచనాన్ని మరొక విధానంలో చూడవచ్చు. మన హృదయం స్వచ్ఛంగా ఉన్నప్పుడు, మన పరిస్థితులన్నింటిలోనూ దేవుణ్ణి చూడగలమని కూడా ఇది సూచిస్తుందని మనం చెప్పవచ్చు. నా హృదయం స్వచ్ఛంగా ఉన్నప్పుడు, నేను నా చుట్టూ ఉన్న పరిస్థితులన్నింటిలోనూ, ఆయన చేసే ప్రతిదానిలోనూ, ఆయన చెప్పే ప్రతిదానిలోనూ దేవుడిని చూస్తాను. దేవుడు అన్నిటిని నియంత్రిస్తున్నాడని నేను చెప్పగలను, ఇతరులు నాకు చేసే కీడులో కూడా, దేవుడు దానిని నా మంచి కోసం ఉపయోగించడాన్ని నేను చూడగలను. తనకు జరిగిన అత్యంత కీడు విషయంలో యేసు దేవుడిని చూడగలిగాడు. గెత్సేమనేలో రోమా సైనికులు ఆయనను బంధించడానికి వచ్చినప్పుడు, పేతురు ద్రోహియైన యూదా యేసుక్రీస్తును మోసం చేయడం మరియు అతని యజమానిని బంధించడానికి వస్తున్న దుష్ట రోమా సైనికులను మాత్రమే చూడగలిగాడు, కానీ యేసు వారిని చూడలేదు. ఆయన, "నా తండ్రి నాకు ఇచ్చిన గిన్నెలోనిది నేను త్రాగకుందునా?" అని అన్నాడు. పోస్ట్‌మ్యాన్ ఇస్కరియోతు యూదా లేదా పరిసయ్యులు మరియు ప్రధాన యాజకుడు కావచ్చు, కానీ అంతిమంగా ఆ గిన్నె తండ్రి నుండి వచ్చింది. ఒక లేఖ మీ ప్రియమైన వ్యక్తి నుండి వచ్చినట్లయితే, పోస్ట్‌మ్యాన్ దుష్టుడిలా కనిపిస్తే ఏంటి?

యేసు హృదయం స్వచ్ఛమైనది; కాబట్టి, ఆయన ప్రతిదానిలోనూ దేవుణ్ణి చూశాడు. అందుకే ఆయన బంధించబడుటకు, అవమానించబడుటకు మరియు సిలువ వేయబడుటకు అంగీకరించగలిగాడు. ఆయన హృదయం స్వచ్ఛమైనది మరియు ఆయన ప్రతిదానిలో దేవుణ్ణి చూశాడు. మనం మన హృదయమంతటితో దేవుణ్ణి ప్రేమించినప్పుడు మరియు ఆయన ఉద్దేశ్యం ప్రకారం మనం పిలువబడినప్పుడు, ప్రతిదీ మంచి కోసం సమకూడి పనిచేస్తుంది (రోమా 8:28). మన హృదయం స్వచ్ఛంగా ఉంటే, దేవుడు అన్నింటినీ మంచి కోసం పనిచేసేలా చేస్తాడు. మన కోరికలకు సరిపోని పరిస్థితులలో ఇతరులు మనకు చేసే చెడును మనం చూసినప్పుడు, "దేవుడు ఉన్నాడు" అని మనం చెప్పగలం. అందుకే హృదయ శుద్ధిని అనుసరించడంలో అపారమైన ఆశీర్వాదం ఉంది.

మనం లేఖనాలను ఎక్కువగా అర్థం చేసుకునే కొద్దీ, లేఖనాలలో యేసును మరింత స్పష్టంగా చూస్తాము. చాలా మంది లేఖనాలను అధ్యయనం చేస్తారు, యేసును చూడరు. వారు ఒక సిద్ధాంతాన్ని చూస్తారు మరియు వారు ఒక సిద్ధాంతం కోసం పోరాడుతారు. కానీ మన హృదయం స్వచ్ఛంగా ఉన్నప్పుడు మరియు మన కళ్ళు స్పష్టంగా ఉన్నప్పుడు, మరొకరు ఒక సిద్ధాంతాన్ని చూసే అదే లేఖనం యేసును వెల్లడిస్తుంది. పరిశుద్ధాత్మ బయలుపరచే యేసు మహిమను మనం చూస్తాము, అది మన హృదయాన్ని ఆయన వైపుకు ఆకర్షిస్తుంది, ఆయనను మరింత దగ్గరగా అనుసరించడానికి మనకు సహాయపడుతుంది.

విధవరాలి ఉపమానంలో యేసు చెప్పినట్లుగా, మన హృదయాలలో రాత్రింబగళ్ళు దేవునికి నిరంతరం మొరపెట్టుకోవాలి (లూకా 18:7 చూడండి - "దేవుడు ఎన్నుకున్న ప్రజలు రాత్రింబగల్లు ఆయనకు మొరపెడతారు"). మన శత్రువుయొక్క శక్తి నుండి విముక్తి కోసం, పరిశుద్ధాత్మ అగ్నిని మనం ఎప్పటికీ కోల్పోని స్వచ్ఛమైన మరియు శక్తితో కూడిన జీవితం కోసం మనం ఆ విధవరాలిలా మొరపెట్టుకోవాలి. ఎయిడ్స్ వ్యాధికి భయపడటం కంటే మనం పాపపు ఆలోచనకు (అపరిశుద్ధ లేదా ద్వేషం లేదా లోకత్వం లేదా ధనాశకు) భయపడాలి. ఇశ్రాయేలులో ఒక సమయంలో దేవుడు, తనను "ఆధారము చేసికొనుటకై తన్నుతాను ప్రోత్సాహపరచుకొను వాడొకడును లేడు" చెప్పాడు (యెషయా 64:7). తిమోతి కూడా తనలో ఉన్న ఆత్మ అగ్నిని "మళ్ళీ రగిలించుకోవలసి వచ్చింది" (2 తిమోతి 1:6). దేవుడు మనలో స్వయంచాలకంగా ఏమీ చేయడు, ఎందుకంటే అది మన స్వచిత్తాన్ని హరిస్తుంది. కానీ ఆయన మన జీవితాల్లో, ఆయన కోసం, ఆయన ఉత్తమమైన వాటికోసం కోరికను చూసినప్పుడు, ఆయన మనకు సహాయం చేయడానికి శక్తిమంతుడిగా ఉన్నాడు.

పౌలు చేసినట్లుగా, దేవుని ముందు మరియు మనుష్యుల ముందు తమ మనస్సాక్షిని పవిత్రంగా ఉంచుకోవడానికి హృదయపూర్వకంగా ప్రయత్నించేవారు ధన్యులు, తద్వారా వారు హృదయంలో స్వచ్ఛంగా ఉంటారు. ఎందుకంటే వారు, వాక్యంలో మరియు వారి పరిస్థితులలో దేవుణ్ణి ఎల్లప్పుడూ చూస్తారు.